Vasci nuvuli, u çielu tocca a terra,

l’acqua pari ittata a bbacilati,

u vientu tutti cosi spazzulia:

eni matina e mmenṭṛi pari sira.

Rarrieri lu bbaccuni râ me stanza

a niputeḍḍa mia fora talìa,

ccu lu ituzzu mi l’ammuṣṭṛa a mmia,

façiennu “vuuu” ccâ vucca, com’u vientu.

Cc’amuri su’ ḍḍi rricciuli ntâ testa,

parunu moḍḍi tutti r’oru finu,

m’arriri e ssi cci fa nta la facciuzza,

sulu ’i na patti, razziusa na fussiteḍḍa.

Si li manciassi unu ḍḍi masciḍḍi.

Vivi ḍḍ’ucciḍḍi, parunu ru’ stiḍḍi.

Cci accarizzu ntâ testa li capiḍḍi:

parunu scuma, tantu sunu liegghi.

Stenni i virazza, vo’ bbeniri mbrazza,

quannu la pigghiu, fotti iḍḍa m’abbrazza,

s’appoia la testa supra la me spaḍḍa

e ccumincia a cciucciari cca vuccuzza.

 Cci cantu allura iu na ninnananna,

anzi nun cantu, cci la mmummurìu

na canzuneḍḍa nvintata ri mia,

unni la vita è ttutta na minzogna.

 

Na vita c’accussì, unu sa sonna:

na vita çina ’i meli e ccina ’i manna,

ri palazzi ncantati e principissi,

tutta ri cosi bbelli e ri ricchizzi.

Ri cannuna r’argentu e oru culatu,

ri suddati ccu spati ri cattuni,

ri carrammati tutti ri turruni,

ri bbummi fatti ’i panna e cciucculattu.

E nun t’ȏ ricu, no, nicuzza mia,

ca la vita nunn’ è na puisia,

tantu, ppi quantu mmucciari t’ȏ puozzu,

prima o puoi lu capirai ri tia.